Sunday, October 25, 2020

OTAK BABI

OTAK BABI


Mama Barek : Zeu...Zeu bangun su, ko ni tidur sampe siang bolong gini ni ? Bangun sana mandi pi cari kerja. Ko ni mama ongkos ko su jadi serjana baru ko pu model macam gini ni?

Zeu : izzzz....mama e. Sa baru tidur ni.

Mama Barek : Apa ko bilang? Ko baru tidur ? Sekarang su siang bolong gini baru ko tidur ? Tadi malam ko pi bagantung di mana ? Sekarang baru ko mau tidur? Pi mandi sana, pi kasih maso lamaran biar ko kerja. Anak macam apa ni. Ko lama-lama mama kasih masuk lagi dalam perut.

Zeu : Sante to mama, nanti semua indah pada waktunya. Nanti sa dapat kerja. Sa ni serjana.

Mama Barek : Walah....ko ni balik nasehat sa lagi ni pake firman tuhan? Pi gereja ju cuma natal saja, baru nasehat saya macam ko pastor saja e. Bangun mandi sana su.

Zeu : Aiz mama e, sa tidur sedikit lagi.

Mama Barek : Zeu e... ko ni mama ongkos ko kuliah di Jawa sana sampe jual tanah sepotong peninggalan nene tu sampe ko jadi serjana baru te mau cai kerja sana?
Kalo tau ko macam begini, bending dulu mama piara babi saja yang bisa jual dapat uang dari pada piara ko yang otak macam babi saja.

Zeu : Kalo gitu sa pi beli paketan buat liat cara tulis lamaran kerja di om geogle.

Oleh : Pati Helan/Jj

No comments:

Post a Comment